Poezia e Ibnul Xhezeriut (Texhuid)

Leximi i Kuranit konsiderohet ndër ibadetet (adhurimet) më të vlefshme. Memorizimi i tij është derë e cila na afron me Allahun, na lartëson në Xhenetin e Tij, e na nderon edhe në këtë botë. Allahu e bëri Kuranin shërim për sëmundjet e zemrës dhe pastrim për ndryshkun e saj. Dallimin mes leximit të thjeshtë të arabishtes dhe leximit të Kuranit  e bëjnë rregullat e Texhvidit. Prandaj, ajo që na ndihmon në leximin e saktë të Kuranit është njohja e lëndës së Texhvidit. Kjo disiplinë shkencore trajton mënyrën e këndimit të Kuranit, udhëzon drejt ndalimeve të sakta dhe fillimeve të drejta gjatë këndimit të ajeteve, si dhe ndihmon në mënyrën e të shkruarit të Kuranit. Praktikimi i rregullave të Texhvidit konsiderohet detyrë për çdo musliman, sipas aftësive dhe mundësive të secilit. Ky vendim vjen duke u bazuar në praktikën e Profetit tonë ﷺ, sahabëve të përkushtuar dhe të gjithë hoxhallarëve të angazhuar me leximin e Kuranit. Kjo praktikë dhe traditë e leximit, e përcjellë nga gjenerata në gjeneratë është suneti i leximit të saktë.