Rreth këtij kursi
Vlera e mësimit të Kuranit
Pasi Allahu ﷻ ia mësoi Kuranin Muhamedit ﷺ, ai ua mësoi atë shokëve të tij. Këtë e dëshmon Allahu ﷻ në Kuran duke thënë: "Mos nxito (o Muhamed) në leximin e Kuranit me gjuhën tënde. Ne e kemi për detyrë t'i mbledhim pjesët e tij e ta lexojmë atë. Dhe kur ta lexojmë atë, ti përcille leximin e tij. Pastaj, e kemi Ne për detyrë ta shpjegojmë atë." Andaj ruajtja e Kuranit është bërë duke e mësuar përmendësh atë dhe duke e shkruar në materiale të ndryshme të kohës. Kështu që mësimi dhe përvetësimi i Kuranit ka mundësuar edhe ruajtjen e tij, gjë të cilën e ka garantuar edhe Allahu ﷻ Për vlerën e mësimit dhe leximit të Kuranit Allahu ﷻ thotë: II Ata që lexojnë librin e Allahut, e falin namazin dhe nga begatitë që ne u kemi dhënë japin fshehtazi e haptazi, ata shpresojnë në një fitim që kurrë nuk humbet. Që Ai (Allahu), do t'ju plotësojë shpërblimin e tyre, e edhe do t'ju shtojë nga mirësia e Tij, vërtetë Ai është falës i mëkateve dhe shumë mirënjohës." Përveç kësaj për vlerën e mësimit të Kuranit, flasin edhe shumë hadithe të sakta. Transmetohet nga Uthmani r.a., se e ka dëgjuar Muhamedin ﷺ, të ketë thënë: "Më i miri prej jush është ai që e mëson Kuranin për vete dhe ua mëson atë edhe të tjerëve."
Po ashtu transmetohet nga Ebu Umameti el Bahilij, se e ka dëgjuar Muhamedin ﷺ, duke thënë: "Lexojeni Kuranin, sepse ai do të vijë ndërmjetësues në ditën e gjykimit për ata që e kanë lexuar." Këto dhe shumë argumente të tjera nga Kurani dhe suneti dëshmojnë dhe konfirmojnë rëndësinë dhe vlerën e mësimit të Kuranit, duke nxitur dhe inkurajuar besimtarin që me çdo kusht të mësojë leximin e tij.
